الأدباتى: شعر عامى

‏إظهار الرسائل ذات التسميات شعر عامى. إظهار كافة الرسائل

الاثنين، ٢٠ مايو ٢٠١٣

يا هل تري ؟

يا مزودين الحزن

القلب مليان وجايع

عصفور أنا ع الغصن

وحيد مشتاق وضايع

*****

شمسي مالت للغروب

طفَّت نورها اللي شايع

يا هل تري هايجي فجرى

وأ شوف عصفورتي تاني

ولاًّ نهاري اللي جاي بكرة

يمكن ماهوش طالع

الشربيني خطاب

قوم بينا يا قاضي

نعدي أنا وانت البر التاني

نلم عضم ولادنا اللي بنادي

يااااااااه

مش دي جتة أبويا

اللي فقدناه

كان نفسي يعود

معلِّم أنا ضحكته بسنته الدهب و اللولي

وعضمه المحني والضلع اللي كان مكسور

جنب حجابه الحاجز

حلمه المشروع

ملزوق في سقف بطنه

من الخوف الجوع

وأنا لسه يدوب مولود

أنا فاكر لمَّا امي بعت له ف سينا جواب

وقالت له يا أبو أحمد ما تحملش الهم

اللي من صلبك

ف غيابك ها عمل له حفله و سبوع

*****

وأنا ببدء تاتا و هحبي واخطي العتبة

قالوا لي أبوك مفقود

يمكن مات وشبع موت

ف الغربة وأكله الدود

أو نهشه الديب المفجوع

وكلاب الصحرا السعرانه

آه يا نا

الرمل خبي حبابي عنيه

طلعها شجره وضله تطرح لولاده اللي مشافهمش

ثمرة لبكرة

لما نعدي يا سعادة البية

وندُّور علي أسرانا ف ألف طريق

نرتاح تحت ضلتها من الحر

ونرطب الجوف الحامي ونبَّلْ الريق

ولمَّا أنا وانت نرسي علي بر

نطفي في قلب امي نار الشوق

ساعتها يا قاضي لمَّا هاتنبش ف الماضي

أرتاح وترتاح أمي ف طربتها

مدفونه معاها حصرتها

ها تروق وتخف

بحق وحقيق

لمَّا ها تبدأ يا جناب القاضي

في كتابة رأيك ف التحقيق

هل أبويا جبان

كان بيدافع عني

ولاَّ باعني وخان

وإن كان الهمجي مدان

في البحر العاتي لص وقرصان

بدمه البارد قتل الإنسان

مين يا جناب القاضي

ها يجيب حق الغلبان 00!!؟

السبت، ٢٨ نوفمبر ٢٠٠٩

يا عامر العظم يا أستاذ جيل
ف شعر وف زجل وخلافه
ناقد وقاص له باع طويل
يا ما شال شعرا علي كتافه
****
العيد ده مش كحك بسكر
ولا عيدية حسب التساهيل
العيد فتَّة ولحم مسكَّر
ابعت لي من غير ما تفكر
لحم الخروف اللي دوشنا
من المأمأ طول الليل
هو خروف بجد حقيقي
ولاَّ شريط ف جهاز تسجيل

السبت، ٢٤ أكتوبر ٢٠٠٩

لحسة عسل

خزنِّت شهد الرحيق
ينفعني في زماني
وختم جرار العسل
رغم إني وحداني
وكلي شوق ليها
واللهفة وخداني
****
يوماتي كده ع الريق
يغريني الهوي تاني
قال استغل الخجل
واقطف كده حلواني
من ثغر زهر الأمل
لحسة عسل بلساني

الثلاثاء، ١٣ أكتوبر ٢٠٠٩

فصْ تُوتْ الإهداء 0000إلي فرعون مصر السائح في بلاد الفرنجة

يا اللِّي نايم
تحت سرداب أوهرم
مستني روحك
ترجع للتابوت
0000000
عسل أبيض
يا توت
****
يا اللِّي نايم
بين ضلوع الأرض
مادد عروقك
ف شراقي القوت
00000
عسل أبيض
يا توت
****
يا اللِّي نايم
فوق بحور الشوق
شايل خوفك
ف بطن حوت
0000
عسل أبيض
يا توت
****
يا اللِّي نايم
فوق غصون الشجر
حاضنه جفونك
أحلام البيوت
00000
عسل أبيض
يا توت
****
مستحلي نومك
تحت الحجر
ولاَّ انت لسَّه
ها تنتظر
حكم القدر
ينفد فيك
قبل المعاد
الشمس 00
رجعت م السفر
بعد البعاد
سألت عليك
كل الولاد
قالواخايف يفتكر
سنين القحط
اللِّي فات
سافر وسابنا
خايف يجيلنا
ليكون فرعون
موسي عاد
بعد يوسف
ما مات
ما خلاص يا توت
راح زمن الآهات
جفت آبار الصبر
ونشفت ع الخد
الضحكة
ودموع البنات
والنيل لساه صبي
بيحبي ف عيون
الأهرامات
ما تقوم يا توت
وبلاش عناد
نفض تراب القبر
عن بدنك وهدْ
جدران السكوت
00000
عسل أبيض
يا توت
****
إيه اللِّي قسَّاك
وخلاَّك تهجر
أهلك وناسك
وقلبي اللِّي هواك
هو الكدر ف الغربة
طرح جَفَا ف حِشاك
ولاَّ انت ناسي
كاسك وكاسي
أبو طعم شهد
وسكر نبات
لسَّه فاكر
طعم الأغاني
حضني وحناني
ولاَّ نسيت00!!؟
أوعاك تكون
يا أبو قلب قاسي
جاحد وناسي
بذرة الشوق
اللِّي زرعناها
رمل الشطوط
من يومها قلبي
لسَّه راسي
ف حضن المواني
فارد شراعه
لنسمة شاردة
من هواك
لما تفوت
00000
عسل أبيض
يا توت
****
مش كنت واعد
لما تعود
ترجع هنا تاني
وترد شوقي
اللِّي سبقني وسافر
علي جناح الأماني
ورد خدي
اللِّي زرعته
يوم لقانا الأولاني
مشتاق يضم المدي
عطشان نقطة ندي
تحي الغرام اللِي دبل
ع الغصون
وقرَّب يموت
00000
عسل أبيض
يا توت
****
لو حنْ قلبك
مرة
لفص توت 00!!؟؟
أو حنْ خوفك
لخوفي
ما تخفشْ
من رعشة
كفوفي
لما تفوت 000!!!
تحضن إيدينا
بكرة
ونقطَََّّّع سوا
خيوط العنكبوت
00000
عسل أبيض
يا توت

الأربعاء، ٣٠ سبتمبر ٢٠٠٩

طعنة 00!!

رغم إختراع العلم
لصاروخ ومدفع
وبارودة
دخان نيرانها
يبيد ويقتل
كل اللي جارها
فتلقي نارها
رسول قدرها
بطرف عينها
تجني ثمارها
أرواح خلق
محصودة
****
رغم اللي صابنا
لساها خناجر
الجهل والظلم
تحت العبيان
مغمودة 00؟

رغم إن صدري
كان درع صدرك
من زمن
يا أبو جودة
ليه طعنتك
طول عمرها
في الضهر
من غدر الأهل
موعودة
****
ولا دي زرعة
حقدوغل وخيانة
مين اللي زرعها
في روابي الوطن
يا أبو جودة
بزيادة
ولا دا طبع
وعادة
متأصله فينا 00؟
ولا قلوبنا
الحزينة
صابها العطن
ولا ده غدرك
يا زمن
لمَّا نشد حلينا
ونفتح عنينا
غدرك يجلنا
طعنة متربصة
ومقصودة 00!!?

الثلاثاء، ٢٢ سبتمبر ٢٠٠٩

إتنصَّحتْ

سبب خيبتي
يا دكتوره
عقلي الغبي
وظلام الجهل
ما أعرفش أعد
ولا أفرقْ
بين قمر و هلال
أو نجمة في ضهر
وإيه الفرق يا دكتورة
بين حول أو ضهر
ولا بحسب عمري
طول عمري
كم يوم أو شهر
ولا حتى عارف
ليه الإنسان
في بلدنا
بيموت
م القهر
****
لا بيستفتوني
ولا حتي مرة
جم سألوني
عن راييِّ التافه
ف اللي حاكمني
أو دستوري
أو حتي أختار
عضو قانوني
ف مجلس أمة
أو شوري
غير بالصورة
ما هي البطاقة
المنشورة
لجل أختار
أنا صورة
من كم صورة
لعجل بنطح
سبورة
مش فاهم
الشرح
*****
نفسي أحس
ولو مرة
ف بلادي الحرة
بطعم الفرح
****
فجابو لي
حماره صغيورة
حلوة وأموره
بتعلِّم فيّّ المذكورة
إذاي أتلحْلحْ
واتنصَّّحْ
وأعالج الجرح
****
قلت إتعلِّمتْ
من لغة العصر
بسهولة
و بسرعة ويسر
أصل أنا فهلوي
و فاهم الفولة
فعالجت جروحي
المذبولة
بشوية ملح

الأحد، ٢٠ سبتمبر ٢٠٠٩

الليلة عيد

الليلة عيد
ومسهره
ف عنينا فرحة
خَلَّت شجرة الحب
ف القلب تطرح
سعادة تاني
من جديد
****
منوره
الوش بعلامات
الرضا
بعد ما الفرض
إنقضي
شايفك سعيد
بتقول
المولي عانَّا
ف صلاتنا
وف قيامنا
فصمنا
شهر قرآنا
المجيد
*****
الليلة عيد
ومسهره
ف عنينا فرحة
خَلَّت شجرة الحب
ف القلب تطرح
سعادة تاني
من جديد
*****
دعينا وقلنا
يا رب اقبل
صيامنا وقيامنا
واعتقنا من نارك
اللي ها تحرقنا
لو كنَّا لك
عاصيين
****
دااللي طاع منا
أمرك وصلي
واللي اعتكف
الليل وزكَّا
واللي رد
شوق ولهفة
المحرومين
واللي خلاَّ
الفرحة مرسومة
ف عيون ولادنا
الطيبين
واللي مسح
دمعة حزينة
لمَّا جاب له
لليتامي
العريس
بدلة وجزمة
وللعروسة
فستان جديد
*****
الليلة عيد
ومسهره
ف عنينا فرحة
خَلَّت شجرة الحب
ف القلب تطرح
سعادة تاني
من جديد
****
وحياة و أبوكم
ما تنسوا
تمسحوا دمعة
أم ثكلي
وفرَّحوا ولاد
الشهيد
اجمَّعوا
شمل ولادنا
في الساحات
وعلموهم
إزاي تكون
الفرحة فرحة
باللمة والسلام
بعد صلاة العيد
وانزعوا
م القلب زرعة
شيطان لَّئيم
يا سلام
دا الصيام
هو اللي عطَّر
بالمسك روحنا
وطيب جروحنا
من عند روحنا
ولد الخصام
فخرجنا
من رمضان
صاغ سليم
الليلة عيد
ومسهره
ف عنينا فرحة
خَلَّت شجرة الحب
ف القلب تطرح
سعادة تاني
من جديد
*****
اتجمعوا بالحب
و فرَّحوا
البنات والبنين
واتفسَّحوا
في بلاد الله
سياحة
وامرحوا
فتلاقوا القلب
من فرحته
يدق بالحب
تاني من جديد
الليلة عيد
ومسهره
ف عنينا فرحة
خَلَّت شجرة الحب
ف القلب تطرح
سعادة تاني
من جديد

السبت، ١٩ سبتمبر ٢٠٠٩

فرمان عثماني

الفتونة عصر
وأهو فات
زرعة ولاد
الحرامية
مماليك وذوات
في عصر
موت الحرية
كات حاكمه حارات
مليانه شعب
بعد ممات
هزمهم جيش
تركيا
*****
منهم لله
أولاد عثمان
لهفوا الخلافة
بكتاب فرمان
وحبسوها
في باب عالي
من ناس عايشه
لكن أموات
مع أن لسه
الروح فيهم
واكلين شاربين
ذل و إهانات
والقلب رغم
الم الحسرة
لسه فيه
نبض ودقات
****
أصل المصيبة
في حب الذات
لو قلت سبني
بقي ف خالي
ابعدني يا عم
عن دول بالذات
وسبني بقي
أربي عيالي
زرعوها مهنة
في حبة عضلات
طرحت شجر
منفوخ ع الفاضي
علي باب حارتنا
واقفه فتوات
هي الخصم
وهي القاضي
والجهل نايم
ع العتبات
رافع شعار
الخوف عنوان
قام شيخ حارتنا
في لوح كتاب
علم ولادنا
صبيان وبنات
الخوف يموت
من نورآية
لو كنت حافظ
حاجة م القرآن

الأربعاء، ١٦ سبتمبر ٢٠٠٩

حجج00!!؟

مسكوا ديب ضرسان
قال إيه وصحوُّني
قوم يا راعي الغنم
يا نايم علي ودانك
يا مهمل في رعيتك
عنها وليه غفلان
****
احمي قطيع الغنم
وتيوسها والخرفان
أصل سبوعة البراري
لبدالك يوماتي ليلاتي
وعينها ع الحملان
****
قلت هاتوا المتهم
طبعاً وانا غضبان
وسالته عن التهم
كم نعجة كل والتهم
من زمان وزمان
****
ليه جي ورا الغنم ؟
عامل لي فيها غلبان
ماشي وراهم ليه ؟
مبسوط قوي وفرحان
كلب حراسه لهم 00أ؟
هو انت من الشجان
ما تقول حكايتك إيه؟
ولا انت يا مفتري
خانس لنا ومكران
****
قال أوعوا تظلموني
ذي ولاد يعقوب
كذبوا واتهموني
وطلعت انا المظلوم
كل الحكاية يا قاضي
عيان والبدن هفتان
الحكما كانوا قالوا لي
أمشي ورا القطعان
أصل تراب رجليهم
موصوف دوا لعيوني

الثلاثاء، ١٥ سبتمبر ٢٠٠٩

أول وآخر الكلام

أول ما نبدي القول
نصلي علي النبي
غاية المني شفاعته
والشرب من حوضه
لو أبقي ف جماعته
يتحقق مطلبي
****
بشفاعته وهدايته
اخش ويَّا الصحبة
تحت عبايته ورايته
جنة ونعيم ربي
مرادي ومكسبي
****
بتقول لي
قبل ما اخش
يا منتحل اسمه
أصلي واسلم عليه
هوانت طامع ف إيه؟
غير قوتي وعزمي
ولا انت فاكريني إيه؟
يا بو قلب متعبي
ربك هو اللي عالم
بالسر اللي متخبي
من غيرعتاب وملام
أول وآخر الكلام
اكبت أنا غضبي
أصل العيب بالكلام
ما يتردش عليه
كدا علموني
من صغري
أقول قبل الفطام
اللهم صلي وسلم
علي الحبيب النبي
وزيد وبارك عليه
يهرب شيطاني الغبي
وياخد معاه غضبي

الاثنين، ١٤ سبتمبر ٢٠٠٩

منك لله يا معاوية

منك لله يا معاوية
علِّمت ولاتنا الغََصبْ
وفن نهب الجزية
ومص الدم من القلب
****
بنيت مجد أمية
بغدر وخدع الحرب
شديت شعرة من اللِّحيَّة
مربوطة ف سط الشعَبْ
ترْخيها يشربوا ميَّة
وتشد وهاتك ضَربْ
*****
منك لله يا معاوية
مهدت طريقة ودَربْ
لحكم ولاد الجارية
ملوك سلاطين العُربْ
*****
قال إيه شرطين البيعة
م العيلة ولي العهد
لو كان سفيه وعبيط
ينطاع ولازم ينحب ْ
*****
لسة محافظين ع العهد
وبياخدوا أمن وعهد
من كام دولة ف الغرب
منك لله يا معاوية
عيِّشتْ الخلق ف رعب
والخلق فاقدة الحيلة
بيدعوا كل ليلة
رافعة الأيادي
للرب

الخميس، ١٠ سبتمبر ٢٠٠٩

الشيب مش عيب

نور الشمس
كل يوم
برحل ويغيب
لو ناسي الأجل
المتقدر
في علم الغيب
ونهاية الرحلة
المتخبيِّ
اليوم أو بكره
ف عالم الغيب
****
ها تجيلك لحظة
إنذار يا حبيب
ينحني ضهرك
وتعجِّزْ
والشعر الناعم
ومسبسب
راخر هايشيب
****
ما تخافشي
من الشيب
دا علامك نضجك
ورجاحة عقلك
الشيب موش
عيب
****
كم ألف
عروسة بتتمني
واحد زيك
راجل شايب
حكيم ورزين
ناجح في حياته
وموش خايب
متعلم لغة الطير
إزاي يغفر ويسامح
ويعالج العيب
****
عالم متعلِّم
يقدر بالحكمة
يلجم
غضبه الجامح
في طرفة عين
برجاحة عقلة
ورحابة قلبه
يغفر ويسامح
فصبح بين أهله
صاحب وحبيب
***
أنا مرة سمعت
كلام ستي
في السر
بتنصح بنتي
:خدي يا هبلة
واحد أكبر منك
موش عايب
بحنانه يا حلوة
يدلع شوقك
حتى لو كان
كهل وشايب
ما هو أصله
في الحب خبير
****
و أوعاك
من شاب لئيم
له نظرة عين
قاتلة و ساحرة
بكلامه الحلو
اللِّي كأنه
ألحان عصافير
ياخدك للقمرة
والنجمة الساهرة
من غير م يطير
****
يزرع
في جناينك
أشواق وحنين
ويملِّس
بكلامه الناعم
علي خصلة شعرك
ويحرك
قلبك ومشاعرك
ويحط
علي جزوة روحك
نار علي بنزين
وف لحظة عشق
وانتوا تايهين
يقطف ويدوق
رحيق شهدك
حلو مقطَّر
وعد ومكتوب
ومتقدَّر
اصل المسكين
زي حلاتي
من ضي عنيك
اللِّي بكهْربْ
ماشي بالمقلوب
لا قادر يبعد
ولا يهْربْ
ولا حتَّى
يتوب

الخميس، ٣ سبتمبر ٢٠٠٩

مسحراتي صيني

جبت فانوسي
المرة ديَّه
من صنع صيني
أخضر لموني
ضحكوا عليَّ
الأسيوية
شورة حماتي

****
لقيت عليه
يا سعادة البية
تسجيل بصوتي
ومعاه ربابة
وصوت نياتي

****
من كترهم
ها يجننوني
صنعوا المشبك
وأكلوني
صنعوا لباسي
وجلابيتي
وقميص مراتي
بلاش فضايح
جوة بيتي

*****
دناأنا اللي طول
عمري بهاتي
وأصحي بلدي
علي طبلتي
أنشد أمالي
وابتهالاتي

*****
منا شغلتي
ف شهر صومي
مغنواتي ومنقراتي
راس مالها صوتي
علي طبلتي
أشعر يوماتي

****
صيني وجاي لي
راكب لي جملي
يعمل في حيَّ
مسحراتي

****
لابس عبايتي
حتي الجمل
ربطه ف رقبتي
وطردني أنا
من جوة خيمتي
فنمت بره
علي بلاطي

*****
ألاقيش بقي
حد في بلدلنا
شهم وبفهم
شغل الابالسة
م الأجنبي
يجي يغيتني
اصحي يا نايم
وحد الدايم
رمضان كريم

الأربعاء، ٢٦ أغسطس ٢٠٠٩

طعمه حاجة تانية 00!!

يا سلام
عليك يا دنيا
أمَّا صحيح فانية
تقربيني ف لحظة
وتبعدني ف ثانية
ليه فكرتني بالغالية
نظرة عنيها رضا
لو حتي كانت ثانية
****
يا سلام
علي لهفة
قلبي اللي متغرب
لقلب مليان رأفة
بكرة البعيد يتقرب
وأشرب من نبعها
حب وأمان و حنان
بحر الرضا ف قلبها
منحة من الرحمن
لحظة لقا ملهوف
سقتني من تاني
روت غيطان الشوق
من حضنها الدافي
رغم إن انا مكسوف
قالت لي بالعنية
يا ابني اعمل معروف
وارتاح بقي م الغربة
حضنك بعد البعاد
طعمه حاجة تانية

طعمه حاجة تانية 00!!

السبت، ٢٢ أغسطس ٢٠٠٩

رمضان كريم يا شعرا

رمضان كريم يا شعرا
وانتم طيبين
إيه رأيكم لو قلنا
حبة كلام حلوين
****
ننقع حروف القصايد
خشاف للصايمين
مدام غلوا الياميش
بشر وزبيب وتين
حتي الهوا والميَّه
والعيش وقمر الدين
*****
يبقي فطارنا كلام
دعا ابتهال تايبين
أما السحور تهجُدْ
حبة بكا نادمين
نغسل قلوبنا القاسية
يمكن نفوسنا العاصية
ف غفلة أو قول ناسية
عملت ذنوب وخطايا
ناسينها ومش فاكرين
****
إيه رأيكم يا شعرا
نصوم ونفطر سوا
ونكتب قصايد دعا
ولا انتم مش ناويين ؟
*****
اللي ناوي معانا
من أول لشهر الكريم
يرفع إيديه للسما
يدعي معانا ربنا
ويطلب من مولانا
يهدينا والسامعين
واللي مكسوف
من ذنوبه
اللِّي بالملايين
يقول ورانا ف سره
بصوت عالي آمـين

الخميس، ٣٠ يوليو ٢٠٠٩

تـنــهــيــدة 00!!

قمرنا الليلة ليه غايب
ما هلْ هلاله ولا نوبة
باين عليه نسي معادي
أو راحت عليه نومة 00!
*****
معرفش ليه أنا خايف
يخلف معايا مواعيده
يوحيِّ الشمس تتأخَّرْ
يغيب فرحي يوم عيده
لا يطلع صبح وينُّور
ولا نغني أناشيده
*****
بنات الحورأهي سامعة
شوق قلبي وتنهيدُه
مداريه القمر عنِّي
ما بيين الرِّمشْ والننِّي
وحاجز نوره عن قلبي
عذاب الهجر والغيمة
بعت وراه سنين عمري
تلِّف عليه وتجيبه
ليقت روحي اللي هيمانه
بتقول وردي و تعيده
دعيت وقلت يا ربي
تحن عليه وتزيده
*****
سمعت النسمة بتقولي
بنات الحور مظلومة
قمر ليلك رحل بدري
لنجمة شاردة وبعيدة
خايفة تحب أو تعشق
تطلع روحها ف تنهيدة

السبت، ٤ يوليو ٢٠٠٩

فاضل لي ثانية

روحي شراقي وجدبة
م الظلم والجبروت
شديت رحال الغربة
كلالة وشغل سخرة
لجل الزاد و القوت
*****
في الغربة
الشوق واخدني
تايه ف الملكوت
حاسس يا روحي كأني
فاضل لي ثانية وأموت
خايف بقي أرجع لك
من غير ما اشكي
و ابوح لك
جثة هامدة
ف تابوت
****
فابعدي
عن حضن قلبك
القاسي من حراسك
واللي ما ف مرة حبك
ولا باس تراب مداسك
ألقالي سكة لقلبك
أنفد منها و أفوت
أخدك ف احضاني
وآخد الولاد
في حضاني
وأفضل لحد
ما موت

السبت، ٦ يونيو ٢٠٠٩

مالكش امان

ما لكش أمان
أوبا ما آه ينحني
للعظمة و السلطان
فهد العجوز ما انحني
ولا خاف من الشيطان
في قلبه الكعبة والقبلة
مهد الورع و التقوى
خاتم الرسل و الكتب
رسول الهدي بقرآن
*****
تقلب يا ديب في طباعك
عارفين طريقة الملعبه
انت وباقي أتباعك
برضو ما لكشْ أمان
****
عادة وطريقة المصطبه
ساعة السلام مرحبا
والأيد ممدوة بالسلام
ساعة الحروب ملحمه
والنصر للإنسان