شعراء من الزمن الجميل 00 متولي عبد اللطيف

شعراء من الزمن الجميل
متولي عبد اللطيف
شاعر يقارب عمره ثمانون عاماً ، اعتقل مع المرحوم الشاعر فؤاد حداد في زنزانة واحدة في معتقل الواحات ، ومازال قلبة ينبض شعراً ، يقيم في مدينة شربين بمحافظة الدقهلية ـ مصر أطال الله عمره

أنا يا جماعة خلاص ملِّيت
اصل مكاني مش ف البيت
اكل وراحة 00ومهما لقيت
الحرية بتجري في دمي
حتي ورا القضبان غنيت

يا نعسانين
يا صباح الخير00 ردوا عليَّ
يا نسمة شيلي الناموسية
وقولي للنايم 00 يصحي
ويشوف جمال الصبحيَّة
***
الشمس طالعة بتوب احمر
ذيِّ العروسة بتتمخطر
وراخيه عينها علي الميَّه
وتوبها ع الأرض مجرجر
والطير علي الأغصان غنَّي
وريشه بالشمس إتحنَّي
والنسمة فرحانة بتلعب
هي وفروع شجر الحنَّه
****
وحمامة مالت لوليفها
توشوشه ويوشوشها
ويقول لها في السر كلام
تحن وتفرش ريشها
*****
يا نعسنين والكون صاحي
وكانه سهران صبَّاحي
صباح جميل يا هنيالكم
يسعد صباحكم وصباحي
رموش يمامة
حبيت وكان السبب
في الحب حورية
الخد ناطق
بخفة دم مصرية
والشعر نازل
كما الصفصاف ع الميَّه
والعين سوادها
خطف قلبي وخلاَّني
أرخي جفوني
وأرد النظرة لعنيَّه
***
ماشيه علي الجسر
قلبي بيمشي نحيتها
وسنابل القمح
قاعده تشدْ جلابتها
والميَّه في القنا
تبتسم لبسمتها
ناداها قلبي
ونجم السعد وافاني
رقصت فروع الشجر
من هزْ ضحكتها
****
صحت الطيور الِّي كانت
راقدة في اعشاشها
حضنت صغارها
وشافوا الأمن في ريشها
وكل طيره فريحها
طبر يناغشها
حنت يمامتي وشافت
إني وحداني
مالت عليَّ
وغطت وشي برموشها
****
الهوا غيَّه
فتحت بابي المتعصفَّر
والمرْ خلِّيته مسكَّرْ
واتشتَّروا وإنت الأشطْر
ولا لك ديَّه
****
بدَّرتْ والمحصول بدَّرْ
لملمت كل المتبعتر
والباقي أمره حيتدبَّرْ
ويعود ليَّ
***
ولا عتْش أقلب فنجاني
وأداري فرحي ف خلجاني
جري إيه يا ناس 00؟
خلِّي وجاني
صافي النيَّه
****
مفيش استسلام

رفرف الطير الأسير
نفسه يطلع يوم يطير
والهوا يمشط جناحه
د الحبوب ف الغيط كتير
****
باتت الأفكار تناوشه
والأمل قاعد يناغشه
يا سلام لو يبني عشه
فوق شجر جنب الغدير
****
فاتت الأيام تقيله
والزمن ما بيده حيله
آه يا أيامي القليله
يا تري إيه المصير
****
إنتي المسكين وفزْ
والشبكْ ف ضلوعه حزْ
لمُّه في المنقار وكزْ
وانطلق في الكون يطير
رغم انف الزمهرير 00!!

إمتحان

صعب السؤال والإمتحان
وأنا طول عمري تلميذ بليد
متهوم بقتل الأمل وضوء النهار
مع إن والله العظيم م التهمة بريء
أنا لمَّا بشوف في عنيك ضيِّ القمر
بنسي السؤال واحس كأني
اتولدت تاني من جديد

رد الإهانة 00 حذاء دانة

رد الإهانة 00 حذاء دانة

فرَّقْ ما بينا بوش
بخسَّة وعمل ملعوب
قتل ولاد حييِِّنَا
ناس مننا سندوه
ف رحم الوطن أمنِّا
لمَّا الولاد حاربوه
****
بيحاربوا كيد العدا
بنبله تحدف طوب
عقابه في شرعنا
اصل العقاب مطلوب
نجاهد اللي ظلمنا
بنضال قوي وحروب
****

نلعن أسلاف جدوده
ونسله واللِّي جابوه
الغدر مش طبعنا
مهما اكون مغلوب

وجهاً لوجه النزال
الحرب لها اصول
رماح سيوف وخيول
آخر الكلام والقول
لو حتى ضهر أتانة
رد الإهانة نضال
بسلاح ذل و مهانة

نعل جمل عربي
ممسوك بالمقلوب
أو جذمة ذي الدانة
أو ضرب بالمركوب

مختوم قفا و00

إية اللي جرالنا يا جماعة
اتهنَّا وبقينا مسخرة
ان قلنا رأينا بصراحة
ونقدنا بجد ومشطرة
طريقة الحكم ابو شماعة
والتركة المقسومة ظلومة
بمقص النهب ومسطرة
*****
قالوا سالمة يا سلامه
من غير زفَّه ومزيكا
أو حتى حاجة تلهيني
الواد اللي أسمه أوباما
الأسود إبن الكيني
صبح رئيس لأمريكا
****
قلت يا خلق الله فوقوا
واتعلموا الشيكا بيكا
نختار الريس ع المركب
ذي الطريقة ف امريكا
*****
أتاريني دسيت منخاري
في سيد قرارة من ورا
ربطني علي ضهر حماري
كسر مناخيري وخلاَّني
م الضرب اقول انا مرا
****
دا غير كلام وفعل ابيح
مكسوف يا ناس إني اقوله
نفسك تعرف اللي جري
أن قلت خليها ف سرك
من غير كلام ولا نأورة
ضهري مجروح بعلامة
مختوم قفا و مؤخرة

شماته

الدنيا ذي المدام
بعنيها أنْذالك
لو نفدتْ بجلدك
من ظنها وغيرتها
يبقي أبو زيد خالك
****
احمد ربنا لرضاها
حمياك وطبخالك
شايله هموم البيت
ومربية في عيالك
بتشورعليك وشورتها
دايماً بتصلح حالك
****
كل الحريم فيها خصله
تدعبس دايماً في راسك
وتفتش في جحور عقلك
عن سببب فتور حماسك
وتدعبس في محمولك
كلمت مين النهاردة
وفين بتبخبي مالك
ولو خبيت عنها
يا صاحبي افكارك
وعرفت ياعم صدفة
إن الفشل صابك
تشمت فيك وتقول لك
: طول عمرك معاندي
لا خدت مرة بشورتي
ولا بتسمع كلامي
ياما نبِّهتكْ وحذَّرتكْ
م اللي جري وحصلكْ
بالذمة يا بو عيالي
مش كنت قيلالك

قطوف من فن الزجلْ المصري

غيثيات نجاتي
وقع تحت يدي ديوان زجلي مجهول اسم الديوان واسم صاحبة ، فتصفحته لعل وعسي اعثر علي ما يدلني عن الأسماء والعنوايين ، فتبين لي أن مواضيعه لصيقة بطبقات المجتمع وفي فترة زمنية اعتقدت أنها قبل ثورة 1919 م وعرضت الأمر علي أصدقائي في نادي أدب شربين بمحافظة الدقهلية بمصر ، وإذا بصديقي محمد هزَّاع يخبرني انه يعد عنه رسالة ماجستير وحصل علي
وثائق رسمية من نسخ مجلة الصياد من دار المحفوظات ونجاتي غيث كان يشغل سكرتير تحريرمجلة الصياد منذ ما يقرب مائة عام ، وتبين أنه كان بينه و بين الزجالين رسائل متبادلة بالزجل في غاية الطرافة، تحتوي الردود علي معاني مثل عامي ، فأخبرت صديقي أحمد إبراهيم الشهير " بالصابر أيوب "
واقترحت عليه أن نقدم هذا الرجل علي المواقع الأدبية والثقافية للشعر العامي والزجل وعلي صفحات الإنترنت علي أن يقدم هو عنه دراسة ثم يعقبها دارسات ممن يرغب في الكتابة عن فن الزجل في كافة المنتديات ، والديوان من عدة أبواب سوف نورد منه مقتطفات من كل باب ، وسوف نوافيكم بباقي الديوان كاملاً إن شاء الله تعالي
الباب الأول
( في النصح ولإرشاد )

النصيحة قبل الفضيحة
المطلع
فن الزجل دا فن غريب000
يضرب مثل نتربي بيه
أوزن كلامه إن كنت اديب000
وخش في البيت من بابه

دور

شوف الزجل كالدر يتيم000
كله حكم كله أمثال
نظمه زها من فكر سليم000
زجل ولا كل الأزجال

دور

ما حد مثلي شال أكدار 000
والدهر طلَّع لي عنيَّه
كم للزمن عندي " ادوار " 000
وكم له دورة وصبحيَّه

دور
0000000000

الباب الثاني
( في التهاني والمديح )
يقول نجاتي في مقدمة الباب
" قلت مرحباً بمرسح الشيخ سلامة حجازي أستاذ الغناء والتلحين ليلة تمثيله رواية صلاح الدين الأيوبي ببندر شربين رحمة الله عليه

المطلع

قوللي إيه ذنبي علام000
انت يا قلبي كليم
من ليالي ( الشيخ سلامة ) 00
نسمع الصوت الرخيم

دور

القمر شوف ليه امرني 000
بالسهروالليل طويل
قاللي يوم واحد وسابني 000
انكوي بنار الخليل
قلت يرجع واللي نابني 000
كله يطلع في الغسيل
لمَّا جاني بالسلامة 000
قلت والله العظييم
من ليالي الشيخ سلامة 000
نسمع الصوت الرخيم

دور

لك يا مرسح ألف هيبة 000
بحر بسبحْ فيك واعوم
لك ( مناظر ) والغريبة 0
تكسب الناظر علوم
المدارس00 للشبيبة 000
والمراسح000 للعموم
من ليالي الشيخ سلامة 0
نسمع الصوت الرخيم

****
نجاح الملاح

يقول نجاتي غيث علي لسانه " وقلت مهنئاً ( ابن خالي ) الشيخ أبو العنين الملاح تاجر الأقطان وعضو المجلس المحلي بشربين لمناسبة احتفاله بليلة القدر من شهر رمضان المعظم كما هي عادته في احياء ليالي الشهر المذكور كل عام بالقرآن واخراج الزكاة واسداء الحسنات تقرباص إلي الله واحتساباً لوجه الكريم

خللِّي شهر الصوم يهددني بهجره000
وانت غنيني وهنيني بعيدي
يا ابني كان الدهر غرقني في بحره
لولا ملاح السفينة خد بإيدي
يعني في دي روحي للملاح
جبا
إن قبل

إن قبل يا فن هات لجله القوافي 000
وارصف الِّلي مال عن المايل ومال للِّي
لولا إنه في الحقيقة خل وافي
ما جعل صورتي قبال عنيه تمللِّي
وحباها كل ساعة
مرحبا
واحتفلْ

****
000000
0000
الباب الثالث
( في المراثي والتأبين )
يقول صاحب الغيثيات "
قلت راثياً ومؤرخاً بطل الوطنية الخالد رئيس الحزب الوطني المرحوم محمد بك فريد
يا ميت عباد الله

المطلع
خطبك جلل عطل بحور الزجل 000
بين" السريع" والمديد
عني الهنا والصبر بعدك رحلْ0000
يا ميت عباد الله عليك يا " فريد"

***
يا ميت عباد الله علي اختفي نوره
وكان البدر يعشق سناه
علي اللِّي شاف ماله انتهي ما اكتفي
حتى صرف عمره وربه اصطفاه
علي الغريب اللِّي رأي " مصطفي "
فايز بجنات النعيم اقتفاه
يا هاجر الدنيا جميلك وصل
وساكن الجنة لكونك " شهيد "
عني الهنا والصبر بعدك رحل0
يا ميت عباد الله عليك يا " فريد"

***

الباب الرابع
( في المقاطيع )
" جمع مقطوعة "

" قلت مؤرخاً ختام عام مجلتنا الصياد "

المطلع

صفا دهري وكان جاني 000
علي حظي وصالحني
وسعدي بالهنا جاني000
وبعد الهجر صافحني

دور

ولمَّا البخت ساعدني000
وشفته بعد ما إدلَّعْ
فكلمته وكلمني 000
وقرَّظني وقال لي اسمَّعْ

دور

أري بالصبر والهمَّة 000
ونور فكرك وارشادك
ضياء الفكر بالذمة 000
ختام العام لصيادك
1920 م 1338ه

****
وقلت في الشكوي من الغلاء

المطلع

فين الشرف فين الإسلام000
فين المروءة والغيرة
راح الفقير شخَّه ف حمام000
بين الغلا والتسعيرة

***
أزمة وخسارة ودين وغم وغلا
واللِّي ابتلي بالهم دا ماكفاه
إن افتقرْ 00 يظهر بحبة صلا
وإن إغتني يكفر ويعمل إله

***

وعن فن الزجل والزجَّالين يقول نجاتي غيث :

فين بدري انظم له الهالة 000
من بدري وافديه بعنيَّه
يا حكمة عند الزجَّالة 000
الكلمة أبرك من ميَّه
يتبع

فين الكُتَّاب 00!!؟

كان شيخ وعالم
وفاتح ف البلد كُتَّاب
علِّمْ ولادنا الأدب وحفَّظهمْ
كل فنون الأدب وآيات الكتاب
راضي بقليله من طبيخ وجراية
ولا كان له طول عمره ف بنك حساب
****
نسوه ف ريفنا ملبوخ ف همه
يكافح الجهل بشطارة
لاحد ساعده ولا طوروا علمه
ولا حتى ضموه لوزارة
قفل كُتَّابه زهقان وشطح
يشجع الكورة
علي عود قديم عزف
أنا شفته ف المقصورة
بالجبة والقفطان
كان واضح ف الصورة