قلوب

تسلم يمينيك يا فنان

بالفرشة رسمت الفرحة
وميزت قلوب الإخوان
دة قلب غامق ودة أبيض
ودا عندة لؤم وعمى الوان
الحب لما يكون صادق
بين القلوب المتسامحة
يمسح يشطب ع الأحزان

******
ودا قلب جاحد ولا همة
طماع وناكر نعم ربة
ناقم وحاسد دا من حقدة
نارة بتحرق خضار قلبه
يباين لونة على خدودة
لما الحق ياخد حقة
تلقى سوادة لون وشة
فى دنيتة منبوذ وتعيس
مكروة ولا واحد حبة
فى الآخرة مخزى
شارب نارة
ياطول عذابة ومرارة
يفضل ياعنى
كدة ف غلبة

مراســــــــيل

إتـرص إتـرص
يا ورق الـخسْ
يا بو قـلب عـاشـق
ومـــداري
من قـبل العـصر
نقعد نترصْ
صـعيدي با بـوي
وبـحـراواى
صفوف في الغربة
عمال تراحيل
َصرِّين أشـواقـنا
وحنينَّا
بؤجة في مـناديـل
والـصبر
طبيبنا اللِّي بــداوي
جـراح في الـغربة
تـهدّ الحيل
نـرتـاح مـع كلـمة
في غنــاوي
أو نغمـة نـاي
شجي وحـزين
نــحلـم بـيوم
نـرجـع تــاني
نشاور للشمس
قبـل ما تميل
وتدوب نشوانة
في حضن الليل
تبعـت نجوم
السما مراسـيل
تـقول للـحلـوة
عـلي ميعـادي
****
إترص إترص
يا ورق الخسْ
يا أبو ضحكة
نغم وحكاوي
أنا قلبي ببصْ
علي بنت
في خصْ
واقفة قصادهم
وقصادي
ضحكتها غدير
عشاقها كتير
صعلوك وأمير
كتبوا الأساطير
في عنيها
و يا ما قالوا غناوي
غمزتي برمش
عصفوري في العشْ
زقزق وغني ألحاني
أتاريها من أمسْ
غوياني يا عمْ
وأنا برضه كمان
زيِّها غاوي
****
ف عز الليل
ألقاها بتدور
في فلك الروح
الجوَّاني
وأنا مجروح
من سهم ورمش
النجمة الحلوة
بنت يماني
تظهر وتغيب
مرة ف الحول
وتسيب للشوق
فيضان مواويل
يروي ملهوف
قلبه شراقي
اترصْ اترصْ
يا ورق الخس ْ
يا ابوقلب بيبدر
أشواقي