طعم الهوي

عصفوري
الصبح غني
فتحت له عنيَّا
زقزق يلاعبني
فردت له إيديَّا
وعملت قلبي
له عش
مفروش بحنيَّة
غطي شوقي
بجناحه
ولف الهوي
حواليَّا
دوقني
طعم الهوي
طعمه
صباع عسليَّة

ع المــــــــــدااااااق

حق طبيعي
ومطلب شرعي
لكل صبية أبية وحرة
إن البت تقول يا جواز
ليه حابسينها
ف قعر الجرة
دأنا من طبعي
ألم ف قرعي
بدل ما يمد
ويطلع بره
من غير فيش
وبطاقة وجواز
****
بس الشرط قبل الحرت
أصل انا كاتبه ف الإعلان
اللِّي تهزْ قلبي ف سدري
وتشيل منه تلال أحزان
لو تعجبني البت الحلوة
أم الوش لوحة الوان
أدوق الشهد
بطرف لساني
وأمص ف صابعي
لو ها يقولوا 0000
صابه جنان

زي العسل

ليه علي قلبي
ولدي وولد ولدي
صحبة أزهار
ساعة ما أنخْ
ويعملني
جمل وحمار
******
يركب عليَّا
ويسوقني
من علي ضهري
الله عليه
لمّا يقول لي :
تسمح يا جدي
توصلني
ورايا مشوار
****
أطوحه
واشخلَّع فيه
وأغني
لجل ما يسمعني
يحفظ كلامي
ويرجع لي
يسمَّع لي
أحلي الأشعار
*****
أأقلد له
صوت الديك
ما هو صوته
صريح
لمَّا يكاكي
كده ويصيح
لو شاف فجر
وأنوار
أفهمه ف لعبة
وضحكة
وأزرع في مخه
حبَّة افكار
*****
وأدعي له
من صفا قلبي
واقول له روح
يا روح قلبي
ربنا يهديك
سوقني يا ضنايا
لجل ما تفرح
سوق علي مهلك
يسلم زندك
أوعاك تسرح
وتروح بعيد
عن دار أهلك
وأوعي الأخطار
*****
ألاقيه ساحبني
من ودني
زي الايام
بطرحة سته
اللي ربطها
في رقبتي
رشمة ولجام
أمشي وأتهز
وكأني
جمل حمدان
أسند له ضهره
بإديا
فيعيَّط 00
ويتبت فيَّا
زيِّ الشطَّار
لحد لمَا يلعبكني
فنخش صحبة
أنا وهوه
ف حيطة وجدار
******
أضحك وأقهقه
وأظأطط
والقاني فرحان
يزق فيّأ ويتنطط
قال إيه زعلان
يشدني فيوقعني
أعمل كانه غلبني
شاطر يا أبني
منا عارف
إن أنا كسبان
*****
أغسل آلامي
وعذابي
اللي سابهم لي
جوه في قلبي
زمني القاسي
أبو شيخوختي
واللي شفته
في أيامي
أنا من صغري
فأرجع إنسان
*****

 أحضن
وأبوس العسولة
ما هي نايمة
في حجري
بنت خجولة
تمللِّي تصرخ
وتقول لي
حاسب يا جدي
علي خدي
دقنك طويلة
بتشوكني
شايفة يا ستي :
مش راضي يقوم
ويمرجحني
بيضحك عليَّا
وبيقول لي
قال إيه تعبان

نصائح أحمد الشربينى لكل شاعر

كلام مباشر
يا كل شاعر
في الطريق
كان لسَّه جيِّ
يا أحلي ضيِّ
أوعاك تفكر تبقي زيِّ
أو يوم يغرَّك اسم شاعر
قالوا عنه : ملوش مثيل
أو إن وزنه في المجال
من نوع تقيل
يا أبو فكر بكر
إنت الأصيل
******
الشعر عمره ما كان
كلام مرصوص وبسْ
ولا تهويمات بالتفعيلات
ولا هو متحف مفردات
للناس تبصْ
دا الشعر حسْ
الشعر شفرة
لشيء بيجري
يمسْ نبض
القلب مسْ
*****
ليه لأرتباك ؟
قول ما ف حشاك
بسجيتك
قول كلمتك
واطلق معاني
غنوتك
مبقاش مهم
تكون بكا
أو زقزقه
لكن المهم
في فكرتك
ماتكونش باهتة
ملقلقة