وحداني يا امه

مين اللي قال صورتك
غايبه عن بالي
صورتك يا غاليه تمللِّي
واقفة هنا قبالي
شايفها ف ملامح بنتي
تحضني وتبسني
ماهي ذكري بقيالي
****
لما الربيع بيزورني
بيطبطب علي خدي
فيزود ف أحزاني
ويصحي من تاني
كل مواجع قلبي
ليه يا أمه فيتاني
مش كنتي وعداني
طيف ها يجي يزورني
ليلاتي ف احلامي
بيعدي ليلي بطيئ
وانا لسه مستني
يجيلي طيفك ومضه
أولمحة في ثواني

****
برد الشتا طوُّل
ليله اللي وراني
من بين سحاب الغيوم
كوابيس في منامي
عدي ربيعي بدري
وجاب وراه صيفه
رغم حرارة شمسه
حضنه ما دفَّاني
هافضل كده علي طول
لحد ما يجي خريقي
في الدنيا وحداني 0!؟

عفاريت المصباح السحري

ضحك لي الحظ ولقيته
مصباح بطلنا علاء الدين
من فرحتي بالفريكيكو
فركته بإيديا الأتنين
دخن وطلع عفريته
بصيت بسرعة
لقيته اتنين
*****
وقفت أبحلق مستغرب
أطلب طلب ولا اتنين
ولاَّ اجري خايف
وأقوم اهرب
طب بس هاهرب
أروح علي فين
عفاريت وحافظة
أرض الملعب
وهايمسكوني
في غمضة عين
*****
بسرعة سالت
قبل ما أهرب
حضرات جناب
العفاريت
فانوسنا السحري
كانوا قالولنا
ف إصل حكايته
لا فيه فتيل
ولا حبة زيت
جواه عفريت
حارس حارته
صنف واحد
من العفاريت
أمال التاني
دا يطلع مين00؟
****
رد التاني
أبو عين واحدة
وقال يا أخينا اسمعنا
بدل ما اغضب وأذيكوا
مصباحانا واسع ويسعنا
برضاكم أو غصب عنكم
هاعيش معاكم وأدلعكو
انا اللي جي أهنيكو
وإن كنت ناويين
في مناكفة
وحياة أبويا
لوريكو
*****
دنا من زمان
عامل شركة
أنا وعلاء
صاحب المصباح
متسجلة
في متين بورصة
وليَّا فيها نص
الأرباح
والعقد أهوه
ف بنده التاني
مكتوب يا سادة
أنا شريكو

أنا والمدام

هدايا الأعياد

نصحني شاعر خبيث
بدل ما تجيب هدية
في كل عيد للمدام
اكتب لها قصيدة
حب وغزل وهيام
في كل عيد تقولها
تنعنش قلبها وفؤادها
تلقاها من فرحتها
تعيش معاك ليلتها
شهر عسل وانسجام
وكأنك عايش ف جنة
أو حلم من الأحلام
****
سمعت الكلام وكتبت
أحلي قصايد غرام
وشوشتها لوحدنا
بمزاج قبل ما نام
كما عصفور بغني
لحن هديل حمام
بصت بعين ونص
وقالتي قرفانه
مين اللي قال بقي
إن العيدية يا فالح
حبة رغي وكلام
****
منك لله يا صاحبي
كنت سبب الخصام
أدي نتيجة شورتك
ادتني قوام ضهرها
قال يعني قمصانا
والبوز اتمد دغري
خمسة كيلو قدام

قلبها الأخضر

حفظت بيوتها ودواويرها
ودارنا وخيمة ولاد عمِّي
مرسوم ف عقلي دوايرها
لساقية دايره وانا طورها
علي كتافي جبال همِّي
جاررها ومدور نواعيرها
رغم إني داير و متغمِّي
وخالط الميَّة أنا بدمي
وساقي قلبها وغيطي
زرعته صبر من بدري
وجبت المية من نبعي
فعرفت مين اللي شاربها
****
عقلي الداير تاه مني
وخفت من مكرألاعبها
ليكون مصيري مصير امي
وقعت عماينه ف بيرها
وقعت ولا حد داري بها
وأنا لسه بشب واتنطط
وبجري و امسك في ديلها
فكانت الواقعة دي نصيبها
ماتت و معها فرحتها
*****
دبحها القاسي وسلخها
فبانت للخلق عريانة
لا نجدها بسرعة كلاَّفها
ولا سترها بهدمتها
حتي الديابه اللِّي شافتها
متعلقة في خطَّافها
سال علي لحمها لعابها
هي وكلاب سعرانة
قبال أمي سهرانه
تسن سنانها ونيابها
لتنهش قلبها الأخضر
ما هو نصيبها ومنابها
وحوش البدو والبندر
بقايا العضم والكرشة
اللي فاضل من العسكر