كاسات مرُه 00!!

جرالك إيه يا نصر الله ؟
أخويا عبده الساخر
بيسقينا كاسات مرة
بيسخر منك يا شاطر
ولا من حكامنَّا بالمرة
****
من أجل مين ولمين
بنشقي يا ناس ونخاطر
وليه ياسيدي ضحي
شهيدنا سليمان خاطر
يُكنش لجل حزب الله
ولاَّ لجيش عرب خاسر
ولاَّ لأرضنا الخضرة
ولا لبهية بنت النيل
ام عيون كحيلة وسمره
ولاَّ لناسنا المطحونين
واهل بلدنا الحرة 00!!؟
****
لهي ناس بلدنا
ما هيش شاطره
يُكنش قفانا المتسلْطح
صبح لعبة وتسلية
زعيم أهبل معاه تره
بيضرب كبدنا المهري
بفتنة خبثة ف الخطبة
وانا الساذج أبو غطره
أحب اللحم والفتره
وأنام أشخر مع الأمرا
وأنفر زفيرها مع الجرة
دي ريحة الغدر
اللي مابينا
مع الكبر والنعرة
بقت سلعة
بكام وامتي ها تبعنا
عرفوها بدري
بلاد بره
فبتسوقنا أنا وأنت
بفرع ناشف
من الشجرة

زعلان 00!!

مالك ؟
: إيه اللي جرالك
مش واقف ليه
علي بعضك
دايماً قلقان ؟
: واخد علي خطري
يا حبيبتي
ومنكً زعلان
: زعلان من إيه؟
: سيباني واقف
هنا وحدي
قلقان حيران
:طب حيران ليه؟
: مستني القمر
اللي بيطلَّع
في نن عنيك
يظهر ويبان


: قمر إيه؟
: قمري المسحور
اللي انتي ياما
خدتيني ليه
أنا فاكر
لمَّا غمرني
ضيه الفضي
بحر وموجه
لمَّا فتنِّي
خد روحي مني
وتاه عقلي
ولقتني
مش داري
بحالي
غرقان ف النور
بحضن في الدفة
ومتبت
في شراعي المكسور
وبعافر
شوقي الجامح
للورد الطارح
علي خدك
أحمر مكسوف
خلاَّني قطفت
كم وردة
وأنا مسحور
شوقي الملهوف
***



غمضتي عنيكي
وداريتي
تحت جفونك
قمري الخجلان
ساعتها هربتي
ذي الغزلان
لمَّا جريتي 00
أنا فاكر
قلتي 000
ابقي استناني
في نفس مكانَّا
وميعادنا
نقطف من تاني
انا وانت
زهر البستان
****


أعمل إيه ؟
واقف من مدة
مستني قمري
اللي واحشني
يطلع ويجيني
أتاريه من بدري
واقف ويَّايا
بواسيني
وبقول لي
إسألها
متأخره ليه00؟
****
أتاريكي
واقفة واريا
وأنا 00!!
مش واخد بالي
عامله روحك
مش شيفاني
خايفة لعيوني
تيجي في عنيكي

أمسية المؤتمر الشعرية " فصحي وعامية "

مؤتمر اليوم الواحد
ملامح الإبداع في نصوص معاصرة

صورة مدينة دمياط

غلاف كتاب الأبحاث

[I]"

الطوابع الشعبية "[/

I]

الطوابع الشعبية عنوان البحث الذي أثار جدلاً واسعاً في مؤتمر دمياط الثقافي وخاصة أن الباحث معجب بقائله الأستاذ " شوقي ضيف " قائد من قواد جيش مجمع اللغة العربية في حربه علي اللهجة العامية ، فما أورده الباحث عن دونية الأدب الشعبي و توقف حرب الفصحى والعامي من وجهة نظر الباحث الذي رأي انتهاء الحرب و انتصار الفصحى و الذي اعترض عليه بشدة الأستاذ محمد العتر وأساتذة النقد المنهجي د 0أحمد الحسيني والأستاذ قاسم مسعد عليوة ومتابع الأمسية وجميعهم طرحوا في مداخلاتهم أن الشعر العامي والزجل مجهول المؤلف ألفه الشعب ، قوامه المشافهة بلهجة بيئته وهو امتداد للموالية و الرجز وهو فن شعري شعبي أصيل من فنون القول الفلكوري التراثي المحفوظ في الصدور ، به ـ الفن الشعبي ـ خلاصة تجارب الشعوب و الأمم والقبائل عبر العصور،
يستدعي من الذاكرة حكم التجربة ونتائجها عند كل حالة مشابهة فيذكرنا القائل بها حتى لا نخوض التجربة مرة ثانية ونحصل علي نفس النتائج ، وهذا الحكم سبق وأن صاغه الشعب الفنان بلسان الشعب ولهجته المحكية مشافهة بعد أن تحللت شخوص التجربة ولم يبقي إلا اثر حكمها ، فإذا أردنا إن نعيد صياغة هذا التراث باللغة العربية الفصيحة يفقد هذا التراث طرافته وهي من أهم مميزات الفن الشعبي 000
وكتُّاب الشعر العامي أو الشعبي او اللهجي والحكَّاؤون يتوسلون بهذا التراث في إبداعهم الشعري والقصصي ويتطورون فن القول الشفهي بتطعيم أعمالهم بكلمات فصحية أو أحياناً يعيدون صياغته بلهجة تحتوي علي ألفاظ جديدة ، ينحتها الناس يومياً ويلتقطها شعراء العامية ويضعوها ضمن أعمالهم ، وعلي رأي المثل { اللّي يعجبه موال يردده } والباحث مغرم بمقولة " الفن الشعبي فن الشعب الجاهل " أياً ما كان دافع قائلها ومكانته الأدبية فهو رأي يحتمل الخطأ ويناقضه إهداء الدكتور عبد الحميد يونس في صدر" كتابه الحكاية الشعبية "1968 الصادر عن المؤسسة المصرية العامة للتأليف والنشر ـ دار الكتاب العربي للطباعة والنشر ـ
{ الإهداء إلي الشعب الفنان والناقد 00 أهدي هذه الصفحات ، منه وإليه }
ونحن بدورنا نهدي الباحث نتاج أبناء هذا الشعب الفنان من شعره العامي والفصيح الذي شدا به الشعراء في أمسية شعرية كانت نهاية جلسات مؤتمر اليوم الواحد بدمياط ليكون خير رد يمحو به أمية متلقيه

يميناَ سمير الفيل رئيس المؤتمر والشاعر محمد الشهاوي
وقائد الأمسية احمد الشربيني

1 ـ الشاعر محمد العتر دمياط
الحلم
أنا حلمي مش ليكي
ولا ليوم بيترسم وجعي
في رعشة عنيكي
الحلم كان فيكي
كل اللي فاكره
لما لقيتك في حلمي
ما اعرفش انطق باسمك
جريت أسمر شيش شبابيكي
***
عجوز
قلبي العجوز عشمان يرتاح
ممكن يرمي ورا ضهره
كل الأحلام وينام
ممكن أمسح له دموعه
أو أسيبها تعمل شبورة
لجل ما حدش لا يشوفه
ولا يستناه
ممكن بس ازاي
والقلب عجوز
وعنيه من كتر ما عاشت
.. في الضلمة
وكتر ما عاش يتدرب
يتحمل قوتها
الدنيا فرشت له سوادها
وكأن مفيش قدامها
غير قلبي
إكمنه عجوز !!!
بير الكلام

الديك ع السطح بيدن
ولا معدش؟
صرخة عواميد النور
والنجم الساطع
داير ما يدور
وكلام العشاق
مابقاش في الحب اللي بيسري في وريدهم
مابقاش الحلم الوردي المبدور
ما بقاش غير الزمن الواعر
والتوهة داخل أغوار النفس
ولا حد بيسمع..
ولا حد بشوف
ولا حد بيسأل
الديك ع السطح بيدن
.. ولامعدش؟
الديك ع السطح بيدن
ولا احنا مش احنا ؟
فاتحين شبابيكنا فوق بحر العتمة
والليل متعلق جوه عنيا غريب
هربان من ضوء الفوانيس وخيوط الكون
نغبشت ف قلبه ، سألته ، ندهته
لو يوم راح تيجي
.. افرش كل هدومي عليك
وأخبيك
وافتح صدري لعصف الريح
وقصايد شعري في كل بيوت الفقرا
.. وفي كل عيون الاولاد الحزنانة
ونشيد الأناشيد
وفي ساعة ما هاعديك
واحضن أحلامي الوردي
واحضن وطني فيك
ساعتها هاقولك :
لويوم راح تيجي ،
هافرش كل هدومي عليك
وافتح للكلمة بيبان
وافضل اعاتبك
وتعاتب فيّ
وتفكرني بصبايا المزروع
في عز همومي
أيام كان عشقي وجنوني
لطلة سطوع النهار
وأنهار دموع الفضفضة
أيام ما كانت لهفتي الخجولة بتحتويني
والندى في العروق بيطري الحلم
وصوصوات العصافير
كأنها نبضي
كان لسه فيّ الشعر ما ضاعشي
ولا كان آدان المغرب أدِن
ولا كنا عايشين في حلاوة الروح
ولا صوت الديك كان مبحوح
لكن لما آدان المغرب أدن
ساب السؤال مطروح
الديك ع السطح بيدن
.. ولا الديك مدبوح

ــــــــــــــــــــ

الشاعرة تقي المرسي تلقي قصائدها

صباحْ فاردْ شراعه قلوب
بتبدر فِ النسيمْ غنوه
و( نيل ) مهما يمرّرنا
نقول برضُو الحياه حلوه
وليه الحزنْ فيه بالكوم
يفيض بالدمع والقسوه
في شط بيغسله بهموم
وشط يداري فِ الشكوى
دا كانت ضحكته تسكرْ
وكان فلاحْ ومتعافي
وليه دلوقتْ صوته أنينْ
وكان صوته نغمْ دافي
يا بويا مينْ كسر عودك؟
وشلّ ف ايدي مجدافي؟
ومينْ يا نيل حنى ضهرك؟
وعكر قلبك الصافي؟
وليه نخلك صبحْ عاري؟
مطاطي للزمن والريحْ
وكان يعشقْ شموس عزّك
ويغزلْ ضيّها تسابيحْ
صباحك نيلْ يا بو الطيبة
يا بلسم والغيطانْ مجاريحْ
هنستنى الليالي تعودْ
وتزرعْها النجوم تفاريحْ
******

الشاعر سمير الفيل

رقصة
" إلى السيد النماس .. بلا مناسبة "

جوه ضلوعي طيور وبتحب الغنا
.. والزقزقة
أنا نفسي ارقص مرتين
واخرج من الأود
اللي لسه ضيقة
رقص يخطي ع البحور والأفدنة
رقص يصب بهجة
.. ف ايام السنة
لكني فعلا بانكسف
باخجل
واداري نزوتي
.. فيك يا ورق
ياللي نزعت سري مني
خليته علن
واديني بادفع التمن
أدخل في شرنقتي اللي قد البندقة
ولما يفيض بيّ
أرجع واعترف:
جوه ضلوعي طيور
وبتحب الغنا
والزقزقة !
مطر
" إلى أنيس البياع .. شعر بلا حدود "

حس المطر ع البيوت
وأنا حسي جوايا
حاسس كأني باموت
وباردد الآية
وحيد برغم الزحام
القلب بارد .. رخام
ألمي بيصحى
.. وأنام
في الحلق غـُصة وحروف
حس المطر محزون
بلـّل في ورق اللمون
والريحة هلة علينا
ساوي الألم يا أخينا
وان تنده الشمس علينا
لنرد غول الموت
ونقول ماعدش سكوت
هاتي الخـُرق ، والطسوت
.. وتعالي يا داية !

 

 

]
الشاعر أشرف الفضالي يلقي قصائده

الواخد ما بيديش
شعر أشرف الفضالي
لسه بتسأل عن أحوالي ؟!!
تـايــه
زي التمانين مليون
إلا الكام ألف العايشين
من غَيرِ المَغضُوبِ عَلَيهِم
واحنا الضالين
لا بنعرف نمسح جوخ
ولا نشرب كاس وندوخ
كاس إيه ؟!!
دا المَيه الصافيه بتعمل
في المعده تلبك
والفول ابو سوسه بينغشنا
وان عِشنا
فالوالي الخايف م الحرافيش
خلانا نعيش
من رُعبه ف قلب طابور
والثور
لو يوم غمينا عنيه
ما يثور
وف قلب الساقيه يدور
وجيوب الوالي تتنفخ
والناس الشبعانه الخالص
تتمرمغ أكتر في الخير
والثور لساه بيدور
وما بينه وبين العتمه جسور
بتطفي في قلبه
شعاع النور
م الظلم يلالي
ما هي حتي الشمس
ما تعرف غير بشوات الوالي
**********
لو لسه ف عِبِك فار
كنت آجي اصطاده
لكنه ملّ اللعبه وهج
لو واحد قطع السرج
كنت اعرف إن العيشه الكرب
هيجيلها الوقت وتنزاح
لا كِن
الخوف جوه العين
ساكن
**********
ملعونه كروشكم
ووشوشكم
رغم الترميم اليومي
اسودت من كتر الزيف
والسيف
لساه بتار
وكأن ما بينا وبينكم تار
ولانّ القَطر المفكوكه فرامله
قضبانه ضهورنا المحنيّه
من تل القهر
ودما غنا المغروسه ف رمله
باركت جوازتكوا المَلَكِيّه
واحنا اللي دفعنا المَهر
وف لحظه
قضبان القطر اتفكت
وبرغم الحرص الزايد ع الحد
دخل الموضوع في الجد
والخبر اتسرب للوالي
خاف م الطراطير
قال للي كروشهم مليانه
فكّوا الطوابير
**********
لو بس السرقه تبطل شهر
طب يوم في الشهر
هنلاقي الخير بيفيض ويفيض
وساعتها أكيد ها نقيم الراس
ونعيش حراس لبلدنا
مش خُدّام لمعونه
بتاكلها كروش أوغاد ملعونه
تتعدل الكفه
والدفه
تخبطني ف راسي ف فوق
وأبطل ابُص لفوق
واعرف إن الكل اتحالف ضدي
وان الواخدعمره ما يدّي
وان الواخد عمره ما يدّي

الشاعر ابو الخير بدر يلقي قصائده
مفتتح
قعدت تقصقص فـ الورق
تصنع عرايس
و تشك بالإبرة في عين البصاصين
تقرا فـ ورد طه
و عدية ياسين
و تلم من شعر البنات الخصلْ
بتحط ع الفحم شبة
و تطلقْ بخور
ليه يا ضنايا
معدتش حنون ؟!
استنزاف

شجر الكلام ف الخلق صابه الخريف
سقط الورق ع البلاط اندَّشْ
أتنتورت كل الحروف أشلاء
والمعنى لما انشرخ
أصبح هشْ
يامين يلم الحروف
يبدرها من تاني
تطرح قصايد مصايد
دباحة في الشرايين
تطلع من الحلق
تتشظى في الصايب
ترشق في قلب الخايخ
الملعون بداء الأنا
مصاص الدماء
اللي في أول سهم
صاب السدس بجنونه
نعق الغراب في الخلا
حلـّـق تشلب نيابه
ع الخرايب سيل
كل الخرايب ع الخرايط
ملمسها نعناعي
كل الخرايب
في الحقيقة نزيف
يا مين يبني السد
في مجرى النزيف
سامعة العيون صوت الهديل
ع الزيتون أحلام
شايفة الودان صورة الدمار
تفسير
الخايخ الملعون
بداء الأنا الطيني
المستعار العار
البرجوازي النازي
الفاشي الماركسي
التلات ورقات
لاضم جماجم تاج ،
وسوار ، ودلاَّية
رافع في إيده
كاس الدم بيعبي
الخايخ الملعون بداء الأنا
جواك وجوايا
ظاهر وليه نخفيه ؟

سجع الحمام
الإهداء
إلي روح محمد نجاتي غيث
مدير مجلة الصياد
"مجلة أدبية انتقادية فكاهية "لصاحبها ومديرها المسئول
محمد أحمد غيث
مركزها بوستتها شربين غربية
العدد الثاني أو أكتوبر 1925
السنة الأولي

 

 الشاعر مصباح المهدي يلقي قصائده

من ديوان
(وإيه تاني )
هنا القاهرة
هنا القاهرة
وانت من كردفان
هنا القاهرة
الساحرة الألعبان
هنا القاهرة
وانت بيتك هدومك
وفرشك همومك
ورزقك ليومك
إذا قضيَّ يومك
هنا القاهرة
وانت مش حمْل غربة
تفرَّغ همومك
في ميت ألف إربه
طرق فيها ساعي 00
وفيها مساعي
وأجرك إذا تمْ 00
سمْ الأفاعي
تقوم بالمهمة 00
وتعمل مُحّللْ:
محلل سياسي 00
محلل جوازة
محلل براز00
وتدخل جهاز
الثاقفة الإزاز
وتلمس بإيدك
مجاز المجاز
تشوف حد فاض 00
مُعَلِّق رياضي
وشاعر وقاضي
وصاحب دكاكين
ثقافة وأراضي
وصاحب مراكب
سمك في اليونان
هنا القاهرة
وانت من كردفان
هنا القاهرة
الداعرة الألعبان
*****
هنا الشعر
من بزْ أُمْ السخافة
ومهد الثقافة
هنا من زمان
هنا البنت لبسه
ومن غير هدوم
تقوم تلقي نص
القصيدة الغيوم
تطرقعْ لبانه 00
تهزْ اللِّي بان
هنا الإشتغالة 00
وناس عايشه عاله
علي ناس بجد
هنا السوس مزوق
فلا الصبح شقشق
ولا بكره بان
*****
يا ابو الجبهة
محروته طيبة
وشربانه طيب
يا ابو الصدر
أرض الهلال الخصيب
نديَ عليك قريب 00
ولك قلب طيب
ما يعرفش يعمل
في يوم بهلوان
هنا القاهرة
وانت من كردفان

الشاعر السعيد قنديل

من ديوان الشاعر السعيد قنديل

(هنا القاهرة)
هنا القاهرة

هنا القاهرة
والبيوت دمروها
وقتلوا الولاد
والنساء والشيوخ
هنا القاهرة
والحقول خرَّبوها
ودكوا الشجر
بالدانات والصاروخ
هنا القاهرة
والبيوت مش متينة
ملانه بآلاف
الشقوق والشروخ
هنا القاهرة
و الوشوش الحزينة
بدت ف المدينة
وعليها المذلة
ووشم الرضوخ
هنا القاهرة
و أنت مش
من بلاد العجم
ولا أنت المهادن
ولا أنت الصنم
وجيت رغم أنف
بلاد العجب
ومرغم تشاهد
فصول المهانة
وترشي المهانة
وتحزن علي الدم
فوق التراب
وتلقي الخراب
اللِّي فاتح ببانه
مطلَّع لسانه
وعازم جيرانه
وفارش علي الأرض
رمل العذاب
وتلقي الغراب
اللِّي ناح في البلاد
وفرَّق كؤوس
الضني ع العباد
وشايل جناحه
الرايات الجداد
بيعلِّن بداية
سنين الحداد
ويرفع علي
كل ربوة علم
فتلقي الدمار
اللِّي غطي الديار
وضيَّع علي الخلق
شكل النهار
وتلمَّح بعينك
آثار الآثار
وحاكم بينده
في عز النهار
عمار يا بلد
يا بلدنا عمار
وتغرق لوحدك
في بحر الندم
هنا القاهرة
وأنت لازم تموت
من الحزن والغيظ
عليَّ اتهدم
وتسرحْ بعزمك
لكل السكوت
وتتمني صوتك
يهزْ الهمم
ويسري في عضام
الموات الرمم
ويلعن أبو الظلم
واللِّي انظلم
ويوصل صداه
للحارات والبيوت
ويوصل صداة
للشعوب والأمم
ويوصل مداه
للسما والهرم
ولحظة ما يوصل
ها تقدر تفوت
تفوت من بيبان
الخراب والعدم
هنا القاهرة
هنا القاهرة
وكان لك صديق
في البلاد اللِّي ضاعت
وهالت رحي الغدر فوق التراب
هل الغدر قطع ما بينك وبينه ؟
وقطَّع ما بين الصحاب
ها تفضل حزين
وكاتم في قلب الخلايا الأنين
وتتمني للغد يوم الحساب
فقدنا الصحاب
وكل الصحاب
وحسّيِنا في بلدنا بالاغتراب
ومعقول ها نستني
يوم الحساب
حساب 00!!!!
ما كل الحاجات
عندهم بالحساب
كلام بالحساب
سكوت بالحساب
وقوت بالحساب
تعيش بالحساب
تموت بالحساب
وتزرع غيطانك
بذور بالحساب
وتحصد حقول
الشقا بالحساب
وتدفن صحابك
كمان بالحساب
وتحزن ما تحزن
عليك بالحساب
دمار بالحساب
خراب بالحساب
وحتي الهوا
والتراب بالحساب
ومعقول ها نستني
يوم الحساب
حساب 00!!!!
هنا القاهرة
وانت مستني
السلام م اليهود
تجَّار الحروب
اللِّي خانوا مع
الخلق العهود
وجاروا عليك
وتفرك إديك
الدموع اللِّي واقفة
ف عنيك
ومش راضية تنزلْ
لتغسل حدود البلاد
اللِّي هانت عليك
ولساها في الروح
شوية حاجات
حاجات
ما ضاعت حاجات
وتاهت حاجات
وماتت كتير
م الحاجات ف الغارات
ولسها في قلبي
حبة حاجات
هنا القاهرة
هنا القاهرة
وانت لازم تسلم
وترفع إديك
وجفت من الدمع
ميَّة عنيك
وهانت عليك
البلاد اللي كانت
عزيزة عليك
وطيور البراري
اللي كانت
بتتباهي بيك
أخيرا
عزائي وأسفي إليك
يا ميت بطوعك
وكل الخلايق
بتضحك عليك
هنا الآخرة ً

الشاعر السيد الموجي

كرسى الحلاق

أنا باحترم
كرسى الحلاق
أصله استثناء
من قاعدة
بعد ما كانت داء
قلبت بوباء !
****
بقى أى كرسى
ابن اللى عليه
هو اللى يليه
ويستمر
و( من غير ليه )
زحف الأبناء !
****
أى ابن صاحب
دال مشهور
يصبح دكتور
وابن اللى من
غير دال مقهور
ضاع علمه هباء !
****
وابن اللى
على كتفه الدبابير
وعليكم خير
بكره تلاقوه
له شأن كبير
جوه ( الُقُشلاق ) !
****
وابن السفير
من غير هندام
ولا كُتر علام
مولود بدرجة
قنصل عام
دولة واء واء !
****
وابن المدير
من غير تبرير
هُيبقى مدير
لا كفاءة ولا خبرة
ولا حتى ضمير
ولا حُسْن أداء !
****
وابن الوزير
- ربنا يحميه
ويبارك فيه -
وزير ،
وبكره ولاد معاليه
يصبحوا وزراء !
****
والجامعة فيها
ابن الأستاذ
يصبح لو عاز
أستاذ
ولو يتحرقوا بجاز
باقى الزملاء !
****
وفى الفنون
ابن الفنان
أيا من كان
محجوز مكانه
هو كمان
تحت الأضواء !
****
وابن الرياضى
حبايب أبوه
بكره يخلوه
نجم النجوم
وزمايله تتوه
فى حوارى بولاق !
****
وابن المذيع
بطريق مشروع
أو غير مشروع
مشروع مذيع
مرئى ومسموع
أرضى وفضاء !
****
أما ابن أى رئيس تحرير
أو صحفى كبير
فأكيد
ومن بره الطوابير
جاى للقراء !
****
لكن يا عينى
ابن الحرفوش
هذا اللى مالوش
لا عيلة
ولا جد بطربوش
ولا عنده دهاء !
****
ابن اللى فيه
اللى مكفّيه
بتزيد مآسيه
مش لاقى حد
يحن عليه
بين الأحياء !
****
لا نفع معاه
قرض ( الصندوق )
ولا دعم ( شروق )
من تحت
عمره ما يطلع فوق
حتى ولو فاق !
****
واقع لا فيه
منطق معقول
ولا شىء مقبول
وان قلت ليه
تلقى المسئول
قال باستهزاء !
****
اشمعنى يعنى
ابن الجزار
وابن النجار
وابن الغفير وابن الحمَّار
وابن السواق ؟!
****
ليه اللى وارث مهنة أبوه
منهم تسيبوه
فى حاله
وخلافه تحاسبوه
وكأنه أساء ؟!
****
والرد ببساطة وبشويش
إن الحرافيش
دول اللى مش
لقيين العيش
غير الوجهاء !
****
فيه كرسى
بيخلّى اللى عليه
باشا أوبيه
وكرسى مش
شايلاه رجليه
زى البؤساء !
****
لكن بقى
الكرسى المذكور
محجوز بالدور
ولا يعرف
الغش ولا الزور
ولا الاستثناء !
****
وغير كدا
حواليه مرايات
فاضحة النيَّات
وكاشفة
كافة الاتجاهات
بلا أى زواق !
****
وعشان كدا
أنا شايف فيه
سر يخليه
غير عادى
وواجبنا نحيّيه
كرسى الحلاق !!

الشاعر الشربيني خطاب

كراسي

فيه كرسى
بيخلّى اللى عليه
باشا أوبيه
وكرسى
مش شايلاه رجليه
شايل مراعيب
من ناس بؤساء
****
لكن المذكور
محجوز بالدور
لا بيعرف
غش ولا زور
ولا حتي مجاملة
أو إستثناء
****
داغير حواليه
حبة مرايات
فاضحة النيَّات
ولمَّا بدور
برسم أركان
الاتجاهات
بلا أى زواق
****
وعشان كدا
أنا شايف فيه
سر يخليه
كرسي غير عادى
وواجبنا قال إيه
نحبه و نحيّيه
كرسى الحلاق
له شمخة وعادة
فنقول بزيادة
للي يقعد مره علية
نعيماً 000!!
يا ساعدة البيه
طبقاً لقانون
الأخلاق
****
حلق لي مرة
علي الزيرو
وقال للضابط
المذكور فاق
عقله إ
ذاعة ماسبيرو
من غير ظابط
بتزيع ف نفاق
بانت
تفاصيل القرعة
ما هي بور بقي
من غير زرعة
كلها انفاق
من يجي كم علقة
مجروح ودمي
اللي بينزف
ملوش ترياق

[

الشاعرة سيدة الشولي ـ البور سعيدية فلسطينية الأصل مصرية الجنسية

الخيط الرفيع
( 1 )
بين إيماني بيك وظني
وغصب عني 00
شديت به حلمي
لمَّا اصبح في الحِلْم أوهنْ
من خيوط العنكبوت
المعشش فوق تابوت
جوُّه منه
مفرودة صورة حبِّنا
ولأننا
اتنين وتالتنا الحاخام
فايتينه دايس حيِّينا
بيجزْ وصل المرحمة
ويجزْنا 0!
فالصبر متلحَّفْ كمان
وتحت راسه حلمنا
( 2 )
الخوف علي الخيط
إ ن ق ط ع
تنقسم القطعة
ل ق ط ع
جوَّانا يرمح الوجع
تنفك عقدة الجمود
بعد أمَّا جسر الشوق يقْع
وف ناحية تانية هناك
الإحلام تموت
( 3 )
إذا كان بيناتنا سوء تفاهم
وضَّحي00
نرجع نوصل إشتياقنا
وافرح معاكي وتفرحي
ولاَّ انتهي بينَّا الوداد
واتملِّك الضي السواد
جاوبي 00!!
سامع آنينك
وتمتمة وشوقك في سركْ
سمَّعيني 00!!
بخوفك عليَّا بتوجعيني
خلاص فهمتكْ !
علي أي الأحوال
أنا ابنك
وإنتي 00عيني
( 4 )
شوفي 00!!
بعد ما تسعديه عليَّا
سهل يخرَّج لك
شهادة الوفاة
ويقول : حاولنا 00خلاص
ما بقاش نجاة
سهل تتغير هوِّيتك
تصاحب النجمة أم ستة
وليلك يرافق الجناة

مؤتمر ثقافة اليوم الواحد ـ دمياط

مؤتمر اليوم الواحد
ملامح الإبداع في نصوص معاصرة
دميــــاط في 2/ 4 / 2009

غلاف كتاب الأبحاث ألذي أثار جدل وخاصة مصطلح
" الطوابع الشعبية " ودونية الأدب الشعبي حسب ما
طرحه الباحث و حرب الفصحى والعامي الذي اعترض
عليه بشدة الأستاذ محمد العتر وأساتذة النقد المنهجي
د 0أحمد الحسيني والأستاذ قاسم مسعد عليوة ة وسوف
نتناوله في جلسات المؤتمر فيما بعد



متابعة : الشربيني خطاب
الإهداء
إلي محبي الأدب والأدباء في كل مكان
ونخص بالذكرالأستاذ علاء الاشعل ابن بلقاس
والأستاذ احمد ماضي صاحب الصالون
الأدبي ابن كفر الشيخ


الجلسة البحثية الأولي


الأساتذة /إبراهيم حمزة - حلمي ياسين - إبراهيم عطية -
أحمد رشاد حسانين - سمير الفيل


الأساتذة /إبراهيم حمزة - حلمي ياسين - إبراهيم عطية
- أحمد رشاد حسانين - سمير الفيل
الجلسة التي اثارت جدلاً واسعاً



مؤتمر اليوم الواحد نهج ابتكرته أقاليم مصر الثقافية تحت رعاية
الهيئة العامة لقصور الثقافة لضيق ذات اليد ونقص في ميزانية
وزارة الثقافة في الصرف علي النشاط الثقافي في صالونات
وبيوت وقصور ثقافة مصر ، واللافت للنظر أن المقرر للموظفين من بدلات وانتقالات ومكافأة عن نشاطهم الإداري يبلغ تقريباً ما يقرب من خمسأضعاف المقرر صرفه علي نشاط الهيئة الثقافي
من أبحاث ومؤتمرات أمسيات ومحاضرات علي مدار العام ، ووزارة الثقافة تحصل من الدولة في ميزانيتها العامة
السنوية ما يقرب من مائتي مليون جنيه خمسةوعشرون
مليون جنيه فقط للنشاط الثقافي والباقي حوافز وبدلات
وعلاوات وإنصاف للموظفين الغلابة ، وكأن دور الأدباء
في ثقافة وتوعية البشر قد انتهي وأدي ما عليهم في أوائل
عهد الثورة ولم يعد هناك حاجة لوجع دماغ الوزارة بطموح
الأدب والأدباء ، فما يبذلونه من جهد لتنوير الناس وخاصة
الأميون منهم أو من منهم علي هامش الحياة ، سوف يجلب
علي الدولة متاعب هي في غني عنها ، فالشعب الجاهل أسلس
قيادة من الشعب المتعلم

[

ومثل هذه المؤتمرات ينتظرها الأدباء بفارغ الصبر ، لأنها
ببساطةهي المتنفس الوحيد لهم يعرفون عند اللقاء مواقعهم
من الحركة الأدبية هل هم داخل سرب الإبداع أم خارجه ؟ ، ويتعرفون علي إبداع زملائهم ورأي النقاد فيما كتبوا ، يهتدوا بملاحظات النقاد عن نقاط الضعف والقوة في أعمالهم ، فيجددوا أساليبهم ويضيفوا إلي معارفهم الثقافية روافد أخري تعود علي المتلقي بالفائدة في إنتاج جديدي مع العلم أن جميع الأدباء
يحضرون علي نفقاتهم الخاصة سفر وإقامة وقد يتكبد أبناء
البلد الذين يشكلون أمانةالمؤتمر مصاريف الضيافة من جيبهم الخاص وقد طالب القاص محمد خليل رئيس نادي الأدب
المركزي بالمنصور بان تتضمن توصيات المؤتمر مطالبة
زياد المخصصات المالية أو بمساهم الإدارات المحلية المالية
فلديها صناديق يوضع فيها نسب من إيراداتها المالية للنشاط
الثقافي أو بمساهمة رجال الأعمال بالمحافظة 00
الشهادة لله استقبال ولا أروع وكرم حاتمي من رئيس لجنة
الاستقبال الشاعر جمال البلتاجي وتقي المرسي والقاص
حلمي ياسين المغرم بشيشة التفاح والشاي الكشري بدا من المشروبات علي المقهى حتى باكو مناديل الورق مروراً
بغذاء خمس نجوم محا من الذاكرة الشائعة المغرضة عن
أهل دمياط ، وحين داعبت الشاعر احمد الشربيني
عن هذا الكرم الحاتمي الغير مسبوق



ضحك وقال
: " أمُّال 00 اللِّي جمعه الجدود 00
صرفته القرود ع القرود 00ههههه
مضيعين فلوسنا علي الأدب يا حبيبي "

الشاعر المكرم سيد الموجى



جلسة الشهادات
القاص محمد مختار والمسرحي ناصر العزبي
والدكتور عيد صالح رئيس الجلسة والمكرم شاعر
العامية سيد الموجي والروائي الشاعر محمد العتر





المكرم الأستاذ عبد العزيز إسماعيل مدير ثقافة الدقهلية


فرج مجاهد والبسيوني والشاعر علي عبد العزيز
رواد مقهي المحارب بدون القاص مصطفي الأسمر
والشاعر محمد علوش لظروف صحية




الشاعر محمد الشهاوي ـ كفر الشيخ واحمد الشربيني
ـ دمياط والشربيني خطاب ـ الدقهلية



الشاعر أحمد الشربيني والقاص محسن زايد دمياط
والقاص محمود الديداموني ـ الشرقية



الشعراء احمد الشربيني والشربيني خطاب
وجمال البلتاجي




صورة الشاعران أحمد الشربيني والشربيني خطاب




من اليمين الشاعر احمد راضي اللاوندي والقاص
محمد شمخ والقاص والناقد سمير الفيل دمياط رئيس
المؤتمر ورشا الشربيني خطاب ووالدها
والشاعر مصباح المهدي المنصورة






القاص و الناقد سمير الفيل رئيس المؤتمر والقاص
والناقد الشربيني خطاب



الأستاذ فكري داود رئيس لجنة البحاث ـ دمياط
والقاص عبد الله عبد الهادي ـ الشرقية



القاص حلمي ياسين ابن دمياط المشهور بشيشة التفاح
والمجدعه والشاعر سعيد قنديل كفر الشيخ الذي يحمل
هموم هنا القاهرة وفي الخلف الناقد والصحفي
صبري قنديل كفر الزيات ومحمد خليل المنصورة



كروان الشعر محمد الشهاوي



زهور حدائق الشعر



فكري داود يستظل من حرارة المناقشات
وبجواره عبد الله عبد الهادي الزقازيق



الشاعر احمد وأبوه الشربيني في جلسة شرح وتوضيح



شاعر كفر الشيخ الدكتور حمدي شتا يفحص
باهتمام الصور التي التقطها



الشاعر محمد الشهاوي والشاعرة تقي المرسي



من اليمين القاص محمد شمخ والناقد سمير الفيل
والقاص حلمي ياسين



من قاعة الفن التشكيلي المجاورة لقاعة المؤتمر لوحة
" غضب "
للفنان علاء واشرف الخضري



الناقد صبري قنديل عضو مجلس إدارة اتحاد كتاب مصر
والأستاذ سمير بسيوني عضو اتحاد مصر فرع الدقهلية



الباحث إبراهيم حمزة ورئيس المؤتمر سمير الفيل



الأساتذة فرج مجاهد وسمير بسيوني اعضاء
مجلس إدارةاتحاد كتاب مصر فرع الدقهلية
والشاعر علي عبد العزيز زعيم الغلابة
علي قهوة المحارب بدمياط



الأستاذ عبد العزيز اسماعيل مدير ثقافة الدقهلية
يشكر باسم الثقافة جميع الحضور وبشكل خاص
امانة المؤتمر التي كرمته







الشاعرتان تقي المرسي ـ دمياط ـ وعلا بركات كفر الشيخ


الشاعر محمد الشهاوي




شاعرتان رحاب الحسيني

متابعة بقية جلسات المؤتمر وندوات الأبحاث
والأمسية الشعرية فصحي وعامية 000ونعتزر
لكل من لم نتمكن من تصويره أو اغفلنا ذكر
أسمه دون قصد ونشكر الفضليات الشاعرة
تقي المرسي ورشا خطاب من موقع أسارير
الأدبية لمساعدتهم في تقديم الصور التي التقطوها

انبحْ صوتي

الوش في الوش
وانتِ واقفة قبالي
ف عنيك يا مرايتي
شفت أنا صورتي
باينه ف سكوتي
مغرم صابة وحالتي
من بعد ما رحلتي
رحلت معاكي آمالي
****
هي دي صورتي
ولاَّ طيف وهم وخيالي
ليه إنطفت شمسي
بعد يا روحي ما غبتِّي
أنده عليك ِف الفضا
ولا انتي سمعاني
****
ليه بقي يا روحي
هجرتيني و بعدتي
آه لو مرة فوتي
أو عودتي من تاني
يحن للهوي قلبك
لوكنتي شيفاني
****
خابت ظنوني وآمالي
من كتر الندا عليكِ
زاد همي وأحزاني
أنا شايفه في عنيك
يا روح قلبي ومهجتي
وزاد حياتي وقوتي
ما نابني بعد رحيلك
إلاَّعذابي ولوعتي
وانبحْ صوتي